O concelleiro de Urbanismo e Vivenda, Francisco Díaz Gallego, reuniuse hoxe con diversas asociacións e entidades para escoitar as súas propostas e demandas para o desenvolvemento dunha normativa específica
O concelleiro de Urbanismo, Vivenda, Infraestruturas e Mobilidade, Francisco Díaz Gallego, mantivo onte en María Pita encontros con diversas asociacións e entidades do tecido hostaleiro e inmobiliario, para escoitar as súas propostas e necesidades de cara ao desenvolvemento dunha normativa reguladora dos pisos de uso turístico na que está a traballar o executivo de Inés Rey.
Ao longo da mañá de onte, o concelleiro reuniuse con representantes da Asociación de Administradores de Predios, a Asociación Empresarial de Hospedaxe da Coruña (Hospeco), a Asociación Provincial de Promotores Inmobiliarios da Coruña (Aproinco), a Asociación de Inquilinos da Coruña, a Asociación de Viviendas Turísticas de Galicia (Aviturga) e do Colegio Oficial de Agentes de la Propiedad Inmobiliaria.
O obxectivo, subliñou Díaz Gallego, é escoitar a todos os sectores afectados para acordar as posibles medidas a executar, que poderían pasar por unha modificación do Plan Xeral de Ordenación Municipal vixente e pola aprobación dunha nova ordenanza. Para tal fin, o executivo de Inés Rey constituirá unha mesa de traballo cos distintos sectores, á que se convidará á Federación de Asociacións Veciñais da Coruña e Área Metropolitana.
“Buscamos que haxa pluralidade e prestar atención a todas as partes implicadas, sen perder de vista a evolución recente do mercado inmobiliario na cidade, especialmente no referente aos alugueiros”, apuntou o concelleiro, que lembrou que o Goberno municipal está a traballar na elaboración dun censo que detallará, do xeito máis minucioso posible, os aloxamentos deste tipo que existen na Coruña
