Insiste na necesidade de desenvolver campañas regulares sobre convivencia e boas prácticas cos animais nos barrios
José Manuel Sande, candidato de Por Coruña, a coalición de unidade conformada por Podemos, EU, Alianza Verde e independentes, avanzou este sábado a necesidade de traballar na concienciación cidadá para evitar a proliferación de deposicións de animais que se produce nalgúns barrios da cidade.
Na Coruña hai case 35.000 animais con identificación no Rexistro Galego de Animais de Compañía, supoñendo os cans a inmensa maioría dos mesmos (máis do 90%) e isto implica, ás veces, problemas na convivencia diaria das coruñesas e coruñeses.
O candidato sinala que no actual mandato non se fixo ningunha campaña sobre convivencia responsable e este tipo de situacións está entre as peor valoradas nas enquisas realizadas por colectivos de persoas consumidoras, polo que se compromete a impulsar estas accións para sensibilizar a unha parte da veciñanza, e tamén a recuperar actuacións que poden dar bo resultado.
Sande defende a recuperación das motocicletas de aspiración que mantiña a anterior empresa concesionaria do servizo de limpeza viaria e que amosaron bos resultados en municipios como Bilbao, Murcia, Santa Coloma de Gramanet ou Getafe.
A pesares de que a non recolla das dexeccións constitúe unha infracción de carácter leve, que pode sancionar o Concello entre os 100 e os 500 euros, esta conducta é de difícil aplicación, precisamente polo feito de que a Policía Local debe identificar sen dúbida algunha á persoa que non realiza este xesto, o que implica estar prácticamente presente no momento idóneo.
Por iso Por Coruña plantexa un triplo traballo: Máis medios para a limpeza viaria, concienciación e sancións que poidan exercer unha labor disuasoria.
